2010-08-02

ذكريات مريرة في مثل هذا الوقت قبل 20 عام

في البداية وقبل الحديث عن أي موضوع أو ذكرى أليمه أو أيام حزينه لا يسعنا إلا أن نستذكر وبحزن وبأسى المغفور لهما صاحب السمو الشيخ جابر الاحمد الصباح وبطل التحرير سمو الامير الوالد الشيخ سعد العبدالله الصباح الله يرحمهم برحمته الواسعه ويسكنهم فسيح جناته .
-
قبل 20 عام وفي مثل هذا التوقيت كانت ليلة الغزو العراقي الأليم على كويتنا الحبيه حيث كان يوم الاربعاء 1 / 8 / 1990 وبما أن يوم الأربعاء بداية عطلة نهاية الاسبوع فكان هذا اليوم يوم الزوارة الاسبوعية الى بيت الجده الكبيره ( جدة الوالد الله يرحمها ) وكانت يمعه كبيره تضم تقريبا 15عائله نتيمع في منطقة الخالدية في البيت العود ، وكان معظم الاهل ذاك الوقت مسافرين في عطلة الصيف ، وكان من ضمن المسافرين عمتي الكبيرة مع زوجها وعيالها وعمتي الاصغر منها مع زوجها رايحين لندن (( واللي بتاريخ 4 / 7 / 1990 الله رزقهم بولد راحوا وخلوه عندنا بالغزو 7 شهور ما شافوه ربته يدتي وخالاتي واليوم عمره 20 سنه ساكن مع خالاتي بنفس البيت ومدلعينه آخر دلع وما يرضون عليه ويمكن يسجلون البيت بأسمه )) " نرد حق موضوعنا " كالعادة بالزوارة نلعب كره بالحوش والرياييل بالدوانية والحريم بالصالة والأمور كلها زينه ومستانسين ومرتاحين ، على الساعه 10 بالليل حطوا العشا وتيمعنا بالصاله عشان نتعشى بهالوقت رن التلفون رديت عليه والا تكلمني عمتي من لندن لا سلام ولا كلام قالتلي منو عندك كبير عطني اياه رحت ناديت لها يدتي قلتلها مكالمه من لندن عمتي متصله ، كلمت يدتي عمتي وكانت تقول يدتي أحنا بخير ومتيمعين وما عندنا شي وكلنا زينين لا تحاتونه ولا تخرعونه والغريب بالموضوع انهم كانوا يتكلمون عن الوالد بطريقه غريبه وصار بعدها يمعه عند التلفون ((( الوالد حزتها ضابط بالجيش ومكانه حساس ولو بتكلم عن المواقف اللي سولف لي إياها وعن تفاصيل الجيش الكويتي والغزو والايام الأولى والمواجهه شي جدا جدا رائع ومشرف وجميل بس للأسف غير قابل للنشر ))) " نرد حق موضوعنا " سكرت يدتي الخط جان تقول لنا فلانه " عمتي " تقول ان العراقيين يبون يدخلون علينا واهم ألحين بالطريج من بغداد والبصرة يايين الكويت وهم قاعد يشوفون الجيش العراقي لايف على الـ CCN و الـ BBC الوالد كان وقتها محجوز اتصلنا فيه ما رد وعقب ساعتين تقريبا اتصل على البيت قال ديروا بالكم على نفسكم وانا بخير لا تحاتوني ، هني تأكدنا من الغزو العراقي اتصال الوالد وكلام عمتي من لندن ... ردينا البيت نمنا كلنا بالصاله " ما أدري ليش " قعدت الصبح والا الأهل كلهم عندنا بالبيت والناس اللي أشوفهم مو أهم الناس اللي امس متيمعين ومستانسين الحزن يبين بعيونهم ويذكرون الله ويواسون بعض .
-
قربت يم الوالده قلت لها شفيكم متيمعين ليش يايين عندنا من الصبح قالتي العراقيين دخلوا الكويت قلت لها يعني شنو شيبون قالت يبون ياخذون الكويت قلت لها صوت طيارات فوق البيت شالسالفه ((منطقة بيان )) قالت هذي طيارات عراقيه لا تطلع بره الحوش قلت لها متى يروحون قالت على ما يوصلون الطيارات البريطانية ويطردونهم بس يبيلهم شوي وقت لا تخاف .
-
من باجر " يوم اليمعه " رحنا كلنا مشرف قعدنا في بيت خالي لي شهر 11 / 1990 وكنا شكثرنا ما أدري شلون قدرنا نعيش مع بعض ونتأقلم مع الوضع ما اذكر وايد أمور بس اذكر زين ان قبل النوم كنا نتابع مسلسل مصري أسمه بالمشمش اعتقد كان يعرض على القناة العراقية ... بعدها رحنا بيت يدتي بالروضه قعدنا لي التحرير وكان الوضع بالروضه أخف وأهدا خصوصا من حيث عدد البشر بالبيت ... بالفعل كانت 7 شهور حزينه وأيامها كئيبه ولحظاتها مريره الله لا يعيدها من أيام سوده ... والله يرحم شهدائنا ويفك قيد ما تبقى من أسرانا .
-
يوجد بالذكرى المريرة العديد العديد من التفاصيل الغير قابلة للنشر وهناك بعض الحوادث من الممكن ذكرها في الايام القادمة بعد عمل نوع من المونتاج عليها .
-