2009-03-17

الوضع بالبلد لا يسر لا عدو ولا صديق

اليوم نعيش لحظات كئيبه وصعبه وعصيبه والياي أصعب وأمر والله يستر من المجهول ونتمنى ما نوصل للطريق المسدود والنفق المظلم وحقيقة الكويت وشعبها ما يستاهلون اللي قاعد يصير فيهم .
-
-
-
اليوم رئيس المجلس يقول كل عام وانتوا بخير بعد ما رفع الجلسه .
بعض الاعضاء ويهم اسود ومبين عليهم التعب والارهاق .
النواب اللي ما صارلهم سنه بالمجلس راح يفلسون من كل شي حتى معاش تقاعدي مالهم لان ما مر على عضويتهم سنه .
احمد السعدون يقول نرحب بحل المجلس وانتخابات بعد شهرين بدائرة وحده ونتمسك بدستور 62.
كلام الصقر عن عدم جواز الحل الدستوري مع وجود حكومة التصريف من العاجل امر يخوف .
كلام الصقر في العربيه عن الخلاف بين الخرافي ورئيس الوزراء وانه سبب الازمات يثير علامات استفهام وتعجب .
الانباء عن تكليف سمو ولي العهد برئاسة الوزراء بالاضافة الى منصبه - الانباء عن تكليف الشيخ احمد الحمود برئاسة الوزراء - الانباء عن تكليف الشيخ جابر المبارك برئاسة الوزراء وفي ظل حل غير دستوري - الانباء عن اعتذار الشيخ ناصر المحمد عن رئاسة الوزراء ما ندري منو اللي يدفع بهذي الاخبار وما مدى صحتها .
الخلافات والانشقاقات داخل الاسرة الحاكمة امر جدا مو صحي ويكلف الكويت الكثير ويحملها فوق طاقتها اكثر من اي وقت مضى .
اقصر حكومة في تاريخ الكويت وتشكيل 5 حكومات في 3 سنوات وتقديم 7 استجوابات لرئيس الوزراء كلها تدل على على شي واحد وهو معروف جدا " منو اهم الكويت والا الكرسي "
-
-
-
الحل الدستوري امر وارد وغير مستبعد وعلى الاقل عشان ينظف المجلس من بعض الأسماء اللي شوهوا الديمقراطية وخلوا الناس تسب وتلعن الديمقراطية ومجلس الأمة .
نواب في ....... التاريخ وخروجهم من المجلس غير مأسوف عليه وروحه بلا رده ودفعة مردي والهوا شرجي وما راح اكتب اساميهم حفاظا على نظافة المدونه .
-
-
اخر شي بالفتره الاخيره تم حل المجلس اكثر من مرة واستقالة الحكومة اكثر من مره وعاشت البلد فترات صعبه والصحف والقنوات ما قصروا وكانوا يصطادون بالماي العكر وكانت في اطراف تبي توصلنا للهاوية ،،،، بس اليوم الوضع غير والله يعلم وين بنوصل واستقالة الحكومة وقبولها ليست نهاية الازمة والاحداث ولكنها البداية الحقيقية .
-
مقالة محمد عبدالقادر الجاسم الاخيرة تستحق القراءة وتحذر من الخيار الصعب .
-
الله يستر والله يحفظنا ويحفظ الكويت من كل شر ومن كل مكروه

هناك 3 تعليقات:

  1. اشاعات جس نبض

    ردحذف
  2. ياريت الحل الدستوري
    ينظف المجلس من بعض الاسماء

    والله ياااامعمعه اخاف يزيدون ...لان قوى الارهاب بالعصا والجزره زايده هالايام بالمال السياسي

    ردحذف
  3. إِنَّ مَعَ الْعُسْرِ يُسْرًا

    ردحذف