سوالف بورصوية

اذبحتنا والله البورصة يوم المؤشر أخضر و10 أيام أحمر ، والأسهم صارت على 30 و 40 و50 فلس وما أظن راح تتعدل البورصة ولا راح يتعدل اقتصادنا في الوقت الحالي بسبب وكيل وزارة المالية الأسبق ووزيرها الحالي وطول ما أهو وزير للمالية فلا راح نطيب ولا راح يغدي شرنا هذي المقدمة وإليكم القصة الاولى بالتفصيل ( حقيقية القصة طبعا )

-

-

في سنة 96 و 97 نزلت البورصة وناس وايد خسرة فلوسها وطلعوا المتداولين بمسيرات لين مجلس الامة وكان الوضع مشابه للوضع اللي صار بأول ما بدت الأزمة المالية الحالية تقريبا .

صاحبنا شاب كويتي من أحدى القبايل الكبيرة في اواخر الثلاثينيات من عمره ويشتغل موظف بالبلدية وشهادته اعتقد متوسطة وفي احسن الحالات ثانوية عامة ( ما اعتقد حصل عليها ) المهم حالته صاحبنا صعبة وعليه ديون وما يصفى من معاشه شي ما أطولها عليكم قرر بيوم من الأيام أنه يبيع سيارته عشان تتعدل حالته المادية شوي وبالفعل باعها بمبلغ 4000 د.ك .

بعد ما باع السيارة راح حق واحد من جماعته يملك وعنده شركات وشغله ماشي والله فاتحها عليه وقاله يا فلان انت ولد عمي واقرب الناس لي وانا الصراحه حالتي المادية صعبه والوضع ما يخفى عليك وعندي 4000 د.ك ابي تستثمرهم لي . قاله ولد عمه ابشر وبالشوفه بس لا تأذيني بفلوسك وكل يوم تتصل فيني تقولي شصار وشسويت تراني مو فاضي . قاله صاحبنا لا يبا ماني مأذينك وأنت فصل وأنا ألبس .

بعد أقل من سنه نادى راعي الشركات صاحبنا وقاله انا اشتغلت بفلوسك والـ 4000 صاروا 6000 وشوي تبي فلوسك كلها والا تبي الأرباح . قاله صاحبنا لا يبا كمل الشغل براس المال بس عطني الارباح وقولي شسوي فيهم ابي استانس ابي اشوف الدنيا ابي اسافر ابي اعيش حياة يديدة وانسى الماضي . قاله ولد عمه روح جنيف 5 أيام وادعيلي والمبلغ اللي عندك يكفيك ويزيد .

-

" اهني عاد تبدي الإثارة " حجز صاحبنا حق سويسرا تذكرة وحجزله خوش فندق وبمكان ممتاز واللي يهمنا بالموضوع ان أول يوم نزل الضحى بيطلع يتمشى ويشوفله باللوبي واحد يبين على ملامحه انه كويتي سعودي المهم خليجي بدشداشة نوم كشخة وعمرة بالستينات تقريبا سلم عليه ما رد الشايب السلام طنشه صاحبنا وثاني يوم بنزلته الضحى سلم على الشايب وما رد عليه السلام ونفس الشي اليوم الثالث لكن اليوم الرابع سلم صاحبنا جان يناديه الشايب ويهزأه انت شتبي كل يوم تسلم تعرفني أعرفك وياللي في وياللي ما فيك وسمعه كلام أقشر تضايق صاحبنا وطلع من الفندق زعلان وتعكر مزاجه .

اليوم الخامس والأخير من السفرة بالليل طيارته حق الكويت نزل الضحى بيطلع ويمر على الشايب وما يسلم عليه جان يناديه الشايب قاله شفيك ما تسلم قاله والله ما عرفنالك ان سلمنه عصبت وان ما سلمنا هم اتعصب وبعد اللي صار أمس تبيني أسلم . قاله يابوك اعذرني وانا ما ادري شلون تصرفت جذي وترى مو مني من الهم اللي فيني ، إلا قولي يا ولدي شعندك بجنيف بالهوقت مو صيف ألحين ، قاله صاحبنا عندي شغل ، قاله شنو شغلك تاجر انت ، صاحبنا اهني قام يوسوس شقوله اييبله طاري الأرباح اخاف يطلب مني شي وخايف مسكين على الـ 2000 د.ك وعاد قاله عندي شغل خاص وبس ، قاله الشايب جم تملك ، اهني زاد الوسواس بس قال صاحبنا اللي فيها فيها وقاله أملك 6000 د.ك .

أهوا قاله جذي يقول الشايب طاح بالقاع من الضحك مو قادر يمسك نفسه بتكلم مو قادر والاجانب ما يدرون شالسالفه بس قاموا يضحكون من ضحك الشايب . المهم عقب ما هدا الشايب قاله انطرني أنا بعزمك على قهوه بخوش مكان . انطره صاحبنا ويقول يوم نزل ماعرفته شنو كشخه طلع الشايب بدلته مو صج المهم بعد القهوه والسوالف قاله الشايب دامك ونستني وضحكتني وغيرت علي الجو وطلعتني من اللي أنا فيه هذا رقمي بالكويت أول ما توصل ضروري ضروري تتصل فيني .

رد صاحبنا الكويت وبعد 3 أو 4 شهور تذكر الشايب ودق عليه أول شي ما عرفه الشايب لكن يوم قاله صاحبك اللي بجنيف بو 6000 اعرفه وقام يضحك وقاله ضروري تمرني باجر الساعة 6 الصبح بديوان .... في ..... مو تتأخر . يقول صاحبنا والله قمت من الصبح ومريته والا صج ديوان والشياب متيمعين وأصغر واحد فيهم طايف الـ 65 من العمر المهم دخلت وسلمت وقعدني يمه وسولف وياي بعدين قالي قول سالفتك حق الربع يقول استحيت بعد يرد يضحك علي أهو وربعه ويعزم علي الشايب الا تقول وجان أقولهم السالفه يقول هالشياب ضحكوا ضحك بعمرهم ما ضحكوا وفي جم واحد منهم خفت لا يموتون صج من الضحك .

بعد ما خلص الفاصل الفكاهي صار جدي الشايب و قالي بعد شوي روح البنك الوطني الفرع الرئيسي عند فلان الفلاني وانا أبيلك الخير وسو كل شي يقولك عليه ولا تعترض وإذا طلعت دق علي . يقول صاحبنا رحت وعند الباب قلت لهم وين فلان يوم سمعوا الأسم الكل قام يهلي ويرحب فيني ووصلوني عنده وشربني عصير ما مداني خلصت إلا يايبلي شيك ووقعني على ورقه وقالي توكل على الله وأنا ما أدري شالسالفه ، وطلعت من البنك ودقيت على صاحبي الشايب وقلت له اللي صار قالي الشيك بمبلغ 100 ألف د.ك " تصرقع صاحبنا " قاله أنا ما عندي فلوس أسدد وين وهقتني طال عمرك . قاله الشايب محد راح يطالبك بالفلوس ولا راح ينخصم منك شي بس ألحين تروح البورصة الدور الأول عند المكتب الفلاني وتشتري سهم أيفا بكل المبلغ وانا راح أوصيهم عليك .

راح صاحبنا البورصة وسأله 492 شخص على ما وصل المكتب والا المكتب عنده خبر بالموضوع وضبطوا أمور صاحبنا وعطوه برنت بالأسهم اللي يملكها بعد ما فتحوله حساب تداول بالبورصه . خذا الأوراق واتصل على الشايب قاله الشايب هذيل الأوراق اهم مستقبلك وحياتك واذا ضاعوا بضيع مستقبلك أحرص عليهم وخشهم بمكان آمن . رد البيت صاحبنا وخش الاوراق وراحت السنين بالتحديد بعد 4 سنوات دقوا عليه مكتب الوساطة قالوله مرنا السوق ضروري ألحين دق على الشايب وقاله اتصلوا فيني ربعك اللي بالبورصه قاله أنا موصيهم روح لهم ألحين بسرعة راح لهم وباعوله أسهمه بمبلغ مليون و 700 ألف د.ك ما صدق صاحبنا و استخف وقام يضحك مره ويبجي مره مو مصدق ودق على الشايب وراح له على طول واستقبله وباركله وقاله الشايب ترى ما سوينه شي وموقفك اللي ضحكتني فيه ما أنساه لك وقاله الشايب أنا بذاك الوقت كنت خسران 80 مليون د.ك وياي جنيف ارتاح من اللي فيني لأني لو تام بالكويت جان أنا ألحين بالطب النفسي وحالتي الله يعلم فيها بس انت غيرتني وطلعتني من اللي أنا فيه وونستني وبعدها وطلب منه الشايب ان يروح البنك الوطني يرد لهم الـ 100 ألف قال صاحبنا بعطيهم 500 ألف قاله بس رد مبلغهم هذا بنك مو محتاج منك صدقه لا تفسق على النعمه والنعمه زواله .

-

بالنهايه صاحبنا اليوم يشق ويخيط بالسوق وله كلمته وله وزنه بالسوق . وسامحونه على الإطاله .